身兼男拔校董會主席嘅自由黨成員張宇人上月出嚟噏話，男拔將來搞嘅國際文憑課程，將會打破百幾年傳統，招收女生。八方聽聞有男拔校董好谷氣，因為校董會從來冇傾過呢樣嘢，根本唔係議程之內，但張宇人就同啲傳媒亂咁噏，下次校董會開會一定要張宇人交代！
男拔啲師生都好關注呢樣嘢，有教職員話，要男拔收女生真係好大工程，一來就要加建女廁，上體育堂又要分男女，其實都幾多技術問題要解決。最新一期校報，啲學生仲捉咗校長張灼祥解釋，搞到張校長都急急降溫話，好耐以前都有女拔嘅學生過嚟男拔上堂，收女生理論上係可以，但唔代表係會咁做，大家唔使咁緊張！