上月底，華華先至講過，聯想公布同NBA組成長期合作夥伴，借助NBA喺國際嘅名氣，大搞宣傳，話音未落，原來佢哋已靜靜雞撇甩咗先前嘅集團代言人──細哨朗拿甸奴。
內地媒體引述聯想集團專責奧運營銷戰略嘅副總裁李嵐解釋，自德國世界盃以嚟，由於朗拿甸奴狀態一直下滑，直接影響聯想嘅營銷策略，所以聯想喺雙方合作唔夠半年，就放棄同朗拿甸奴簽訂嘅形象代言人合同。
呢個合約，雙方喺今年4月28日簽嘅，合作時間話就話1年，點知未夠半年形勢又唔同咗喇。李嵐話，今次放棄合作並唔使承擔賠償責任，因為當初簽合同時，有附加條件，就係聯想有權睇吓合作半年嘅效果，嚟決定係咪繼續份合約。聯想嘅評估係，呢次合作雖然收到一定效果，但冇達到預期目標！
朗拿甸奴喺04年同05年連續獲得兩屆世界足球先生嘅美譽，佢喺德國世界盃前狀態勇猛，不單止喺西班牙聯賽率領巴塞隆拿擊敗皇馬奪冠，喺歐洲冠軍聯賽盃亦贏咗阿仙奴捧盃。
人算不如天算
聯想亦係因為咁，斥巨資簽佢做代言人，一心諗住喺細哨嘅帶領下，巴西隊會喺德國世界盃摘冠，細哨亦會成為新一代球王，咁聯想就趁勢推動自己品牌嘅產品。
但係人算不如天算，細哨因為賽事頻繁，身體疲勞狀態下跌，又被傳媒爆比賽期間掛住同女友快活，難怪佢喺世界盃表現差勁。西甲開鑼後，佢喺巴塞嘅狀態仍然唔係咁掂，雖然巴塞仍然係西甲榜首，但銳氣唔及上季，就連新一屆巴西國家隊嘅中場重心位置，亦隨時被喺AC米蘭一夫當關嘅靚仔卡卡取代。難怪氣得聯想要攞番張合約。
[email protected]