大哥大重現江湖聽歌影相上埋網

喺80年代，大哥大電話可謂紅極一時；餐廳食肆，不知幾多大佬鍾意「戙」番部喺枱面，簡直係身份象徵！最近先達就返咗部縮水版大哥大，機身細過當年部水壺一半有多，最頂癮係功能升級貼近大市；130萬像素鏡頭、插T-Flash卡、聽MP3同睇MPEG4等，國產再一次表現無限創意。舖頭老闆娘仲話：「部機太好賣，畀你借走影相，我已經賺少幾嚿水！」國產都咁多人Buy，原來古老當時興係真㗎！
編導：陸俊雄
攝影：陳盛臣
演出：Lo

惡人金撈賤行實錄

收到風話北角惡人「金撈」再次蒲頭，記者一心到佢去開嗰間茶餐廳追訪，聽夥計話：「冇見金撈一排，聽佢講電話先知，原來上咗東莞玩足成個月，噚日啱啱至喺上面返落嚟。」咁啱撞正佢老哥殺到，一坐低就叫咗個菠蘿油搭凍檸茶，全程拎住部「大哥大」起勢講唔停。後尾夥計仲話：「你知佢喇！平時講嘢已經囂張成性，落單嗰陣仲目中無人到用水壺條天線，指住餐牌嚟叫嘢食！」遠望金撈愈講愈興奮，唔使審一定係冧緊女啦，記者為近距離拍下惡人真樣，當機立斷把握機會走近影相，點知啱啱就傾完電話，記者當堂斷正！未知金撈是否心虛，見有人拎住部相機行近，便如驚弓之鳥，嘈喧巴閉話要拆菲林！大佬呀，家陣唔興菲林機㗎啦，好唔Update啫！

■出名惡盡北角嘅金撈終於蒲頭，聲大夾惡慌死人唔知佢老哥出現。

■等嘢食期間，金撈爭取時間冧女出街玩。

■嘩！啱啱烚熟狗頭冧女，轉頭發現記者即時發惡，好有大哥大本色啫！

機仔細細功能齊晒

部迷你大哥大好過癮呢？講多啲你知，佢係國產牌子「別摸我」（BMW）嘅出品，個朵叫X-5，屬2.5G手機，售價千五有找。最大賣點當然係個130萬像素鏡頭，佢唔單只用嚟影相，仲可以用嚟拍Movie；影完相後，仲可以玩後期加工，加啲圖案印章勁似玩緊貼紙相機。另外，由於支援T-Flash卡，用嚟聽MP3或睇MP4影片都冇問題，亦有埋錄音功能，仲可以用WAP上網㖭，夠晒多元化！最搞笑佢仲有項叫「健康管理」，主要係用嚟紀錄身高、體重，同計算女性生理周期。對住呢部拎上手似玩具嘅國產貨，乜都有大雜燴炒埋一碟，筆者呢次真係要寫個「服」字囉！