佘詩曼：「我當然捧番自己主演嘅《鳳凰四重奏》，我要由後生演到老，係一個幾新嘗試，最重要係呢個劇畀到觀眾新鮮感。綜藝節目方面，我好鍾意睇《美女廚房》，因為娛樂性真係好高，好少有節目咁搞笑，每次睇我都笑到停唔到口。」
郭晉安：「我比較睇好《女人唔易做》，一來鄧萃雯嘅演技好，二來劇入面有唔少關於女性用品嘅題材都幾夠膽。綜藝節目我就欣賞《向世界出發》，最好睇嘅地方係一班藝人嘅真情剖白，最印象深刻嘅係羅家英向阿姐表露愛意，真係好感動。」
李力持：「我唔係套套劇都有留意，但覺得《肥田囍事》幾出色，尤其胡杏兒為咗角色特登增肥，好少電視劇藝員肯咁做。綜藝節目方面，我一向鍾意睇旅遊節目，對於《向世界出發》，我擊節讚賞，尤其係羅蘭姐去意大利嗰一輯好感人，自己睇到差啲流眼淚。」
黎諾懿：「我覺得《滙通天下》係好劇集，加上套劇去到北京取景，景又靚劇情又好，所以我認為好有機會攞獎。至於綜藝節目，《向世界出發》應該好大機會攞到獎，最好睇之處係冇稿畀個藝人念，每一集都係佢哋真情流露嘅心聲。」
康華：「《鳳凰四重奏》係部題材好新鮮嘅劇集，我相信好多演員都好恨拍一套有咁大發揮嘅劇。綜藝節目中，我覺得《美女廚房》除咗好笑外，都係個好有教育性嘅節目。」
