如果講畀你知歐洲小國阿爾巴尼亞將會有「球王」誕生，你信唔信呢？唔到你唔信，因為有短片為證！「新球王」𠵱家只有7歲，但甚麼「施丹轉身」、「直角假身」等絕活已經學曉，睇嚟施丹都可以安心退休喇！
身懷絕技又唔獨食
呢段名為《ThenewZidane》嘅短片，長約9分40秒，拍攝者應該係小童父母或者當地教踢波嘅人士，所以畫面質素時好時壞，但無礙閣下欣賞呢位年僅7歲、名叫Armend細路嘅球技；片段內只見Armend見人就過，如入無人之境，想射就射、想交就交，相信大人睇到佢嘅足球造詣都會目瞪口呆，O嘴兼腳震。
Armend喺片段使出嘅絕技，包括喺人馬踏雜中施展「施丹轉身」、學足前「3料足球先生」韋亞般，從後場推至敵方禁區怒射得分、仲有角球直接拉「篩」入網；仲學足施丹可以個人突破之餘，又識得交波做助攻，絕對唔獨食，長程炮分分鐘勁過同年紀嘅施丹㖭！
聽聽網民對此子有何反應？Borissimo說：「有冇人知道可以點樣聯絡佢呀？佢喺邊踢波㗎？」jochow12半信半疑道：「佢真係7歲咋？佢好似超晒班喎！」euro106話：「阿爾巴尼亞啲細路真係勁到好變態。」
http://www.youtube.com/watch?v=5f8i_bY10Tc