金巴利街向來是韓國人的聚腳地，Son跟Lee兩夫婦便於兩年前加入這個小社區，開了這家細小的「秀」。原來Son以前當舞蹈員，太太Lee話：「佢一直都鍾意煮嘢食，咁啱兩年前搬屋嗰陣整親條腰，咪索性轉行開餐廳囉！」老公當大廚，Lee只管樓面，因為她操得一口流利英文。
其實講英文還是韓文並非大問題，最重要是吃到一頓美味的韓國菜，「秀」給我的第一印象是「一啲都唔烏煙瘴氣」，因為這裏不供應韓式燒烤，Lee解釋：「我哋見香港已有好多韓國燒烤嘅餐廳，所以想做啲與別不同嘅，令大家有機會食到較少人做嘅韓國美食。」取代韓燒而成為最受歡迎的菜式，就有韓國麵及石頭飯，Son亦經常創作新菜式，將傳統韓式菜的元素糅合港式或西式食物中，甚有Fusion味道。不過，有時Son好執着，Lee話：「煮完一個餸，佢認為做得唔好，會成碟倒咗從頭再做，令到客人等大半個鐘都無得食，我就要向客人解釋。」因為老公的執着，Lee經常擔當「和事老」的工作，平息客人怒氣，毋庸置疑，Lee就是Son成功背後的女人吧！
記者：黃若茵
攝影：何家亮
辣炒青口 $150
Lee：「Son發現韓國人喺香港好鍾意食豉椒炒蜆，於是佢自己去試食，然後加入韓國辣椒調味，做咗呢味炒青口。」
辣甜酸天狗螺 $180
螺肉跟酸菜都是涼食，入口先是開胃的酸味，愈食愈辣。伴碟還有一份素麵，一啖煙韌螺肉，一啖彈牙素麵，多滿足！
芝士雞蛋卷 $68
雞蛋卷係韓國傳統食物，近年韓國人愛於雞蛋卷裏加入芝士或紫菜。加芝士好香口，厚厚蛋卷裏咬到芝士非常軟熟。
秀（23110133）
地址：尖沙嘴金巴利街7號地下E-A2