以下呢個case可能係好多人都會關心嘅事，相信不難引起共鳴。
網友Sandy同老公喺沙士後買咗層將軍澳樓，賬面上大約可以賺到50萬，𠵱家想賣咗嚟套啲現金傍身，之後就租屋住，但唔知咁唔咁做好，所以喺she.com度問大家意見，引嚟兩派網友教路。
橙餅話：「十多年後，妳還未有一個安身之所，賺錢能力也會隨着年紀而下降，請問妳住哪裏呢？供樓等於幫妳儲錢，而且是強迫妳去儲錢，到晚年妳就知好處。」
投資股市錢搵錢
Amy就唔同意呢個講法，佢認為放咗層樓去投資，先至係上策：「攬住層樓有咩用呢？以錢搵錢，到第日有錢，你慌無機會冇能力再買樓咩！唔好同銀行打工咯！𠵱家我哋用啲錢去投資股票，都有唔錯嘅進賬。」
另一位網友「大人」亦都同聲同氣：「唔好以為租樓住一定係幫人供樓……現在月供啲錢當中，大部份係利息，都係畀銀行賺嘅錢，同租人樓住一樣。如果我係你，我會賣咗層樓租樓住，將D錢放入股市，但當然唔可以全部高風險，唔貪心嘅話，一年10%回報應該唔難。97年股災前嘅HSBC最高位係92蚊左右，沙士時係80蚊，今日已經150蚊。」
不過，好明顯橙餅係穩陣派，佢始終覺得股市信唔過，勸Sandy寧願努力供樓，無風無浪算數：「努力供下去，十年後版主就真係有過百萬或二百萬。老來加上MPF應該可一年去幾次旅行，快快樂樂過活。」