港股上個禮拜氣勢如虹，喺冇外圍股市撐腰嘅情況之下，都可以逼近18800收市，𠵱家睇住嘅喺幾時破19000關炒上。
上個禮拜五人民銀行再調高人民幣嘅存款準備金，有啲分析員話短線負面，中線冇影響，但係所謂負面，係因為從負面嘅角度睇而已。
上兩次上調存款準備金之後，到𠵱家港股係點？國內啲銀行及金融股嘅表現係點？如果嗰陣時你沽咗股票，𠵱家個心口已經揼到好腫，上調存款準備金係較溫和嘅宏調措施，係強化銀行質素嘅一種手段，冇乜唔好，中央一向奉行「摸着石頭過河」嘅策略，揀政策調節嘅時刻一向都好好，睇吓過去10年嘅表現就知道。
如果國際投資者對中國冇信心，啲錢就唔會源源不絕咁流入人民幣同埋其他資產，睇吓隻工行（1398）上市幾捧場？買嚟唔係短炒嘅，上市幾日喺低位收貨，上個禮拜五大買盤湧入推高股價，其他國內銀行股嘅整體表現都好好，今日應該可以繼續炒上，如果國內銀行股有機會輕微低開，就係未入貨嘅股民嘅大好吸納機會。
工行C輪9909：工行上市招股破晒紀錄，掛牌日升咗成半，不過，啲大基金應該未買夠貨，上個禮拜五起步炒，睇嚟好快會上試4元，破位就睇4.30元，𠵱家買工行C輪，贏面幾大。
工行C輪9909上日報收51仙，槓桿率7倍（有效5.8倍），對沖值0.82，對一隻中度價內輪嚟講，呢個對沖值好有吸引力，街貨比例上升，隨住正股炒上，引伸波幅可望回升加快輪價上升速度，正股升上4元同埋4.30元，9909應該會喺85仙同埋1.10元樓上，正股跌穿3.45元止蝕。
俊 樺