孫柏文兄冇幾耐之前話，要商機，去伊拉克賣打火機。到咗呢一刻，見到腳痛咗一排嘅董生鬼打都冇咁精神咁攞「大紫荊勳章」，你就知道，商機，唔一定去到伊拉克先有，其實喺香港都有。
大家可能會話：「車！你班寫稿佬得個噏字，都唔知係咪堅？！」既然係咁，相信唔交個businessplan出嚟，大家都唔會收貨。
假設你今日已經簽到董生做你旗下嘅「新星」，即刻推佢出市場，等於要佢腳痛多一次，實在係唔人道，應該學董生話齋，要「循序漸進」，同「一步、一步、一步」咁嚟。
由今日到出年6月30日，身為經理人嘅你，要不斷吹風，話董生有可能出任乜乜物物，例如下任行政長官，要吹到連Donald都知道為止；而董生同董太則如常出席各親中紅酒酒會，對任何問題，都用董生一貫「耍太極」嘅方式回答，即係答咗等於冇答，呢點，以董生8年嚟嘅表現，絕對唔使擔心佢會漏口風。咁就可以保持董生嘅曝光率，同時，你經理人嘅身份要絕對保密。
宣傳費：一把鉸剪、一個綵球
到咗6月底，要開始放風話董生會出席「七‧一」遊行。到七一嗰日，同董生喺維園高調剪綵，慶祝新公司成立，由維園行到去下亞厘畢道。之後嗰一個月，唔止各大報章社論連日報道，泛民一眾成員酸溜溜咁出嚟話「董生騎劫七一」，親中團體則每日吹噓「董生染紅七一」，各大小短片亦廣泛流傳於YouTube上。你到目前為止嘅宣傳費用，係一把鉸剪同一個綵球。
到8、9月，書展、動漫展推出董生Q版公仔figure同漫畫版自傳《我的奮鬥》，由資深政治漫畫家尊子設計兼執筆，買滿1000蚊嘅朋友，除咗可以獲贈董生即場親筆簽名之外，更送你「董太裝」一件。到呢個時候，你開始「摸和」breakeven。
到10月，你同某親中電視台合作，喺黃金時段推出《DailyShowwithTungChee-hwa》，一口氣打沉隔籬台嘅「慣性收視率」。而第一集，當然係搵坐正冇耐嘅曾特首接受訪問。你開始有盈利。
之後若然可以整個國際版，等鬼仔鬼妹可以上YouTube見到TungChee-hwa，繼而大受歡迎，你已有嘅figure同自傳固然可以行銷海外，而董生嘅身價亦都水漲船高。到時，董生出啲乜都有人買，例如，同董太夾份出本《TwoLuckyPeople》（兩個幸運的人）。借用曾特首嘅一席話：「呢期想唔發都難！」
大家只要上YouTube搵「董伯伯大戰屍屠嘩－Naive同膚淺」就知董生嘅商業價值。