霍老今日設靈，身為治喪委員會副主任嘅煲呔，𠵱家就去咗比利時外訪，做咗「治喪委員駐歐洲代表」。八方聽聞佢嘅行程都有唔少觀光時間，今朝仲可以抽空去遊船河，甚至離開布魯塞爾，去附近一個叫Ghent嘅小鎮睇中古教堂。
同霍家碰杯講節哀
人哋阿扁盜用國務機要費，就搞到差啲落台，好彩煲呔都未至於咁大貪，頂多都係公費旅遊、觀吓光睇吓教堂，點都冇阿扁做得咁揚。
好彩煲呔都算識補鑊，前幾日上咗霍家慰問，但八方睇番新聞處條片，都幾好笑，煲呔口就講節哀順變，但隻手就同霍家啲人逐個碰杯舉杯祝茶，睇落真係怪怪哋，因為通常啲人去飲喜酒、慶祝先碰杯祝茶，好少有白事係會碰杯慰問，煲呔都可能係第一個咁做。唔知呢啲係咪又係強政勵治之下嘅新作風呢？
煲呔今次主要去布魯塞爾同巴黎，政府話佢噚日喺香港出發，今次佢會見比利時首相、財長、歐洲議會議長同法國總統希拉克，仲會同兩國簽訂囚犯引渡協議，要到下星期六先返香港，由於冇傳媒跟住煲呔，佢都唔知幾輕鬆，仲可以避埋梁家傑嘅誓師，如果陳馮富珍爆冷當選世衞總幹事，話唔定煲呔去埋日內瓦同雞姐慶祝。
側側膊黐公費外遊
政府內部話，煲呔至鍾意趁公費外訪，順便早兩日出發，享受吓私人旅遊，而佢最善用條「橋」就係官式訪問周一開始，佢周六或者周五晚就提早出發去觀光。八方記得，佢半年前去星洲咁，人哋星期一先辦公，但煲呔就提早兩日先去星洲，星期日仲有時間坐兩粒幾鐘車去馬六甲睇教堂同鄭和博物館，玩到夜晚返嚟就同記者食肉骨茶（人哋黃亞細唔騷佢，搞到差啲食唔到）。如果煲呔真係咁想觀光，咁係咪應該攞自己啲假去玩呢，而唔係成日側側膊靠黐公幹，然後將貯埋啲假折晒現，迫納稅人同佢買晒佢啲假？
佢臨走前都去亞記接受錄影專訪表揚霍老，費事啲老左成日批評佢。但係繼早前誤將「感同身受」講咗做「身同感受」，佢喺噚日播出嘅訪問，大讚霍老係香港近代史一位偉人，對國家完全無私，往往都係「身先士卒」時，又一次講成「先身士卒」，但自己仲好似唔發現有錯咁噃，Spindoctor係咪應該強迫煲呔上吓四字成語班，免得佢再出醜呢？