做業主嘅，最怕遇着要求多多嘅租客，網友ilovemiffy最近就喺《親子王國》中大吐苦水。「租客係7月開始租我間屋，一開始向我反映電視接收唔清，我叫她自己搵師傅檢查，我會負責費用，師傅建議順住天花重新拉線，但租客認為唔美觀，所以就由sofa位置拉條明線到對面電視，費用$150，我畀咗錢佢。租客未得到我的同意下，買咗一張地毯用來蓋住明線，費用$500。
租客又反映上網線位有問題，所以上網公司要佢買咗一個大概叫做增強訊號的東西，但未有得到我的同意，費用$2000幾。
租客9月頭向我反映洗手盆漏水，我搵師傅上去整，佢話第日再搵師傅上去，師傅整dirty間屋，佢需聘請家務助理清理屋企，會每次向我索償。
佢話喺剛租屋時，覺得間屋值$9000租金，但現在佢發現間屋有很多問題，所以要求減租。
我間屋係新買，買時已經裝修好，所以我都唔知道間屋有咁多問題，所以每次租客反映問題，將心比心，我都會立即跟進，但現在租客又話要索償又話要減租，我應該點做？」
bby回應︰「佢都幾狼死㗎喎，值唔值租呢個問題好主觀㗎，你係唔係經地產租出㗎，如果係問返佢哋有冇律師幫手仲好喇。」
網友：小心個客係租霸
tommythumb就好戥ilovemiffy唔抵，佢話︰「我覺得佢呃你錢，同埋不斷挑剔，目的係要你減租！！唔美觀就買張$500地毯遮住，佢遲d可能話冷氣凍，要買兩件fur嚟着住瞓！！唔該，盛惠$88,888。你同佢講，租無得減，d嘢未經你同意所以你唔會畀錢！！」
遇到咁麻煩嘅租客，大家都好擔心ilovemiffy嘅處境，clpapa建議︰「你𠵱家最好打去香港業主會查吓你個租客係唔係租霸，佢嘅舉動十分可疑，祝你好運。」