上星期提過，前身係97年以編號554上市嘅理文集團，分拆咗手袋業務之後個殼易咗手，變咗漢思能源。呢隻漢思，上周五股價有異動，升咗10%，但係𠵱家股價仲喺幾年低位徘徊。
漢思轉型後從事石油石化品倉儲，唯一經營項目係位於南沙嘅小虎島，近3/4儲量以20年長期合約租予大客中石化（386），其他空位，則長期幾乎全部租出。
即係話，集團可以長期收取穩定倉儲租金，但收入卻好被動，難怪公司股價長期牛皮。不過公司並唔係無新發展，在建項目位於東莞，倉儲量達南沙的3倍，但要明年第3季始提供盈利。
漢思近兩個月經常回購，9月中至今17次回購共9300萬股。股份回購同大股東增持，同樣係公司對前景有信心嘅表現，不同之處，係回購後股份註銷，每股盈利會因而提升。咁點解大股東唔增持？因為主席戴偉持股近75%，已經增無可增。
由於漢思同中石化關係密切，相信東莞新油庫不愁生意，隨着新油庫明年落成，係時候重新檢討呢間公司投資價值。另一個炒上誘因，係公司有批1.05億元票據年底到期，大股東去年曾先配股後行使票據，今次點做？由𠵱家到年底，仲有兩個月時間做嘢。如短炒可以0.44元作止蝕位。
歐陽風