過幾日又係六合彩攪珠，好想中番次頭獎，500萬都好，咁就可以快快辭工，日日做吓facial、浸吓Spa，唔使再捱世界。噚日放假同男友去將軍澳廣場嘅連鎖餐廳嘉美食lunch，埋單時侍應遞封利是埋嚟，點解？拆開一睇，好嘢！竟然係張六合彩五蚊飛，莫非注定我今次中頭獎？($5,000,000)Oo(^_^)
我問老闆盧先生點解咁好送張六合彩畀我？佢話做緊將軍澳廣場分店開張一周年Promotion，為咗答謝班顧客，又唔想淨係減價咁單調，就諗到惠顧午餐送「幸運券」一張，夠晒噱頭。
盧老闆事先聲明，自己唔係助長賭風，純粹送個祝福畀顧客，但一定唔會送啲「幸運券」畀着校服嘅學生或者年紀太細嘅後生仔。佢話逢星期一至五嘅午膳每日送50張，送完即止；佢仲笑笑口話，邊個咁好彩中獎，第時記得繼續幫襯佢就夠喇。嘉美電話：22074646。
男友係旁邊插嘴問，送六合彩得唔得㗎？我即刻打電話問賽馬會嘅老友，佢話《六合彩獎券規例》冇話唔准將獎券送畀人，盧老闆買咗啲獎券就係佢財產，佢點做係佢自由。
逢周一至周四刊出