廣大市民喺換新身份證時，都知可以申請埋政府嘅電子證書，咁為香港郵政核證機關提供電子證書服務嘅外判公司，本來係自己友貿易通，但上周就改為判畀香港億軟信息技術。可以將勁敵貿易通踢咗出局，究竟億軟有乜咁巴閉？
億軟發言人話佢哋喺1999年成立，總部喺香港、廣州同埋上海都有業務。億軟主要為大中華區嘅電訊業界開發專業軟件，主要為顧客比較多嘅企業做一啲客戶互動軟件。
佢哋嘅客戶來頭都好猛，中國移動同埋中國電信都幫襯佢哋。唔知得咗電子證書服務經營權之後，佢哋會唔會同香港嘅電訊商合作，推出需要電子證書認證嘅增值服務呢？
其實郵政局99年推出電子證書到𠵱家，已經蝕咗1.6億，證明家下嘅營運模式唔多掂；億軟已經話明會用全新嘅增值服務，令電子證書服務做到財政自給自足，華華一直都相信，交畀市場做好過政府自己做，億軟畀心機呀！