最近人人都問我去邊度食大閘蟹好，約LisaS.做訪問，估唔到連佢呢個鬼妹仔都話鍾意食大閘蟹，原來佢好識食㗎！仲帶我去有十多年做大閘蟹經驗嘅「仿膳飯莊」食各款蟹粉菜式。順便就考佢拆蟹，點知佢技術純熟到不得了，仲一邊拆蟹，一邊發出讚歎嘅聲音，終於忍到影完相，不消幾分鐘，就啜到隻蟹一亁二淨，佢仲話今年一定要食江蘇太湖蟹！
記者：黃若茵
攝影：伍慶泉
心都食埋唔怕「涼」
自問對大閘蟹唔算着迷，間中食一隻半隻已足夠，但估唔到身形瘦削嘅LisaS.，竟然可以連續食4至5隻，真誇張！「7年前嚟香港，第一次食大閘蟹，以前喺外國聽都未聽過。起初見到蟹箝上面啲毛，覺得好核突㗎！不過試一啖之後就深深愛上。」Lisa真正可以話係大閘蟹嘅DieHardFans，每年都去上海揀選最靚嘅大閘蟹食，經過多年訓練，拆蟹絕對難唔倒佢，「拆蟹最緊要係將唔食得嘅部位攞走，不過我第一次食嘅時候，唔知原來嗰塊小小嘅心臟唔食得，吞咗落肚後，朋友至話食咗會好『涼』，對身體唔好，但我又無事喎！」可能鬼妹仔性格，對中國人所講嘅「涼」完全無放喺心上，甚至連食蟹後必飲嘅薑茶或花雕都一笑置之，「我唔怕『涼』，呢啲係中國人嘅想法啫。」講咗咁耐，係時候考吓佢拆蟹嘅功夫，就由餐廳經理做旁證，睇吓你拆成點先？
拆蟹步驟完全正確！
今年要揀太湖蟹
徐先生：「每年我都會親自上大陸原產地挑選最靚嘅蟹。成本一隻大概要$60，每日我哋賣差不多100隻。除咗原隻食，另供應多款蟹粉菜式。蟹粉要做得肉滑甘香好講究，一定用公蟹嘅肉，因較鮮甜；母蟹嘅肉味淡，只可用佢嘅膏，因為夠甘香，兩者加埋做出嚟嘅蟹粉就天衣無縫喇！另外，跟蟹粉配搭嘅食材唔可以濃味，否則會搶走蟹粉鮮味，所以好少用肉類。最好用淡味兼能夠吸收味道嘅食材，如豆腐、麵、蛋都係唔錯嘅選擇。」
鎮店之寶 太湖大閘蟹
今年我發圍：好多人都知今年陽澄湖嘅蟹唔掂，因為湖水唔夠，蟹換殼次數少咗，所以細隻兼量少。相反我哋呢班太湖嘅大閘蟹就夠大隻，雖然殼會較硬身，但肉更鮮甜，膏更甘香，今年我哋威晒喇！
鮮蟹粉煨白玉例牌$280
先將魚肚出水燜10分鐘，再加入炒過嘅蟹粉。魚肚入口又爽又滑，鋪滿粒粒蟹粉，為清淡魚肚添加陣陣濃香味。
鮮蟹粉拌麵$160
自家製京式手拉麵，每次只拉2至3碗，確保麵條上碟夠爽滑。以菜絲湯煮熟嘅麵條帶清甜，中和蟹粉嘅油膩感。
鮮蟹粉亁燒銀絲$80
撈魚翅太昂貴叫人卻步，不如以山東粉絲代替，比一般粉絲更爽口，煮時加入秘製蟹油，配蟹粉吃有雙層甘香味。
芙蓉鮮蟹粉$80
以蛋白取代豆腐，口感更滑嫩更健康。蛋白以猛火炒，咬落唔會散開一小嚿，質感較結實，與蟹粉簡直係絕配。
蟹粉小籠包每隻$18（最少4隻）
以大菜糕做成湯，切粒後跟豬肉及蟹粉一起拌成餡料，蒸熟後大菜糕融化成湯水，跟金黃色蟹油一起灌成脹卜卜嘅小籠包。
睇埋裝修
搵食攻略
仿膳飯莊（25772018）
地址：銅鑼灣希慎道33號利園5樓
營業時間：11:30am-3:00pm、5:30pm-11:30pm
交通：銅鑼灣地鐵站F出口
座位：250個，設有私人房間
人均消費：午市$100、晚市$160
有着數：以恒生信用卡簽賬，部份大閘蟹套餐可獲5折優惠
最好賣：填鴨，日賣40隻