數當今球壇3大麻煩球星，皇家馬德里前鋒卡斯辛奴認咗第2，阿祖同肥哨都唔敢認第1。
卡斯辛奴先前鬧完教練卡比路無情無義後，就開始擦羅馬鞋，諗住博回巢咁話，點知羅馬見過鬼都怕黑，又點會咁笨吖？
羅馬教練史巴利堤聽到記者提卡斯辛奴個名，就耍晒太極咁話：「現時仲有更加重要嘅嘢諗。」羅馬今年1月先將佢半賣半送畀皇馬，𠵱家點會再次惹禍上身呢？
最好笑嘅係，佢連之前反晒面嘅羅馬「王子」托廸都唔放過，承認自己做錯事，話係因為自己太直，又話應該發SMS恭喜對方就嚟做老竇。其實托廸自己都諗住退位，專心湊仔，又點會同你講好說話啊？儍仔！
我求大俠都係勸卡斯辛奴，盡快向卡比路道歉好過，現時羅馬中前場好手如雲，差就差在欠缺一個高大中鋒，而據傳巴勒莫嘅中鋒卡拉斯奧路1月份好大機會加盟。所以卡斯辛奴死咗條心罷喇！
羅馬只欠中鋒無空缺
不過，佢唔返羅馬又可以去得邊度呢？大家之前都覺得卡比路可以治到卡斯辛奴，點知今次佢連呢位恩師都敢媽叉，咁大逆不道，試問仲有邊間球會敢收留呢？今次卡斯辛奴可算係自己攞嚟衰！
「呢個世界冇話冇邊個唔得，卡斯辛奴係有天份，但衰在目中無人，搞到人見人怕；睇來佢都係唔好諗轉會住，先向卡比路道歉，然後重新做人好過啦！」