HitHotNBA<br>馬貝利話自己垃圾?

HitHotNBA
馬貝利話自己垃圾?

「垃圾!」紐約人控衞馬貝利上周六喺主場揭幕戰俾溜馬以109:95擊敗後,向記者講嘅第一句說話。佢所指嘅「垃圾」當然唔係指佢自己贊助嗰對賣15蚊美金嘅波鞋Starbury;亦唔係鬧全場勁噓佢嘅球迷,更加唔係(或唔敢)指今季新執教鞭嘅紐約人總裁湯馬士領導無方……其實佢所指嘅「垃圾」就係佢自己!
呢位曾經自稱為「NBA第一控衞」嘅「紐約之子」,今場嘅表現簡直羞家,全場9投1中,僅得4分同1次助攻,仲要犯咗6個失誤兼且防守上一塌糊塗。

浪射令反勝機會冇埋

最令紐約球迷火冒三丈嘅係,喺第4節當紐約人追至落後3分之際,馬貝利落番場後竟然頻頻浪射兼失誤,累到紐約人連最後一個反勝機會都冇埋,而且佢仲當眾發爛渣踢個籃球洩憤,結果唔單只俾球證吹咗技術犯規,就連全場嘅紐約人球迷都一齊向佢大喝倒采。
馬貝利今後要做「紐約之子」抑或「紐約之恥」,就要睇佢自己爭唔爭氣喇!