做生意，一定要做大做強，金威集團（910）轉型做高科植林後，就正正係向着呢個目標前進。
先睇最新鮮熱辣嘅消息，金威又同湖南省永州市合作，種植經基因改良嘅桑科構樹，涉及轉讓嘅林地達200萬畝。
仲有，金威又於上月中達成協議，斥資3億元收購北京萬富春餘下的30%權益，成為全資附屬公司，收購的其中1億元在07年底支付，1.4億元在08年底支付，以今明兩年的保證盈利計，收購PE為10倍。
金威轉型後，不斷南征北討，過去半年，集團在中國各地收購林場，累計面積已逾700萬畝，搖身一變，成為林業大亨，股價穩步上揚，基金亦紛紛上車。
好股唔怕揸，亦唔怕多講，5個月來，推介金威4次，第一次係6月8日，當時股價0.335元，現時計股價已上升1.2倍。由於金威已成為行業領導者，股價有條件繼續造好（睇幾多？升幅仍可以倍計），可以上移止賺位持有，賺到盡。
06年度（6月年結），金威只轉型兩個月，但業績已大躍進，營業額3.6億元，升160%，股東應佔溢利8320萬元，而05年度則虧蝕1.5億元。期內攤佔萬富春利潤份額9380萬元，主要來自銷售桑樹樹苗及優質松木。
業績大躍進
現年度，萬富春將提供全年貢獻，有幾百萬畝林地，每年收益係以10億元計，係天文數字，非常可觀。
簡單計算，每畝林地可砍伐出6至8立方米木材，出材率約為80%，目前木材市場每立方米木材價格約2000元，即砍伐每畝林地收入有1.12萬元，扣除砍伐費、資源稅、運輸和加工費合共400元，毛利1.08萬元，700萬畝林地總毛利係756億元！
砍伐現有林木後，騰空的林地將可種植經基因改良的桑科構樹，提供更大收益。金威亦會繼續洽購以百萬畝計的林地，做大做強。
郭兆誠