華創今年蟹宴正

華創今年蟹宴正

又到食大閘蟹季節,每年呢個時候,華創都會請傳媒品嚐吓佢哋個仔五豐行代理嘅肥美大閘蟹,當然順便update吓公司嘅最新狀況。
大閘蟹年年食,但大家都話今年食入口,感覺好味過往年,唔使華華問,華創老總陳樹林就自動報料,佢話原因係五豐行喺蘇州市東山鎮東太湖水域,投資整咗個面積50幾畝嘅蟹場,主要用嚟收購同暫養大閘蟹,全部都係至靚嘅蟹,今年將首年出品整畀大家試。
唔講唔知,五豐行每年供港大閘蟹約70噸,今年自己生產佔咗10噸,雖然由五豐行進口嘅大閘蟹,市場佔有率只佔一成幾,但當中呢10噸自家貨,原來已佔咗最貴品種嘅6至7成。
除咗試五豐蟹,華華見番一個舊朋友,原本以為華潤水泥7月私有化咗之後,就見唔到佢哋位好鬼坦白嘅董事總經理石善博,點知佢一個屈尾十,俾陳樹林點中,由睇水泥調咗睇紡織,新職銜係華潤紡織(集團)總經理,而且佢已經四處睇廠,睇咗3個月,咁究竟有乜新搞作?佢叫我哋畀啲時間佢喎。

陳樹林請傳媒食蟹,等大家試吓佢哋喺蘇州新蟹場(圖)出品嘅大閘蟹。