本報日前就無綫台慶最佳劇集及最佳綜藝資訊節目在將軍澳區進行民意調查，在60名受訪者中，接近半數人支持《女人唔易做》。最佳綜藝資訊節目方面，40人選《美女廚房》，僅次則是《向世界出發》。
Moon：「《女人唔易做》寫實生活化，鄧萃雯有實力，演技係公認，加埋謝天華同林峯都做得幾好。綜藝資訊節目就會揀《15/16》，森美同小儀夠搞笑，問題又廣泛，可以吸收資訊。」
Jenny：「《女人唔易做》都幾好，同現實生活近似啲，而且我幾鍾意鄧萃雯。綜藝資訊節目我鍾意《名曲滿天星》，因為鍾意睇阿姐（汪明荃）風騷唱歌，啲歌又有共鳴。」
梁小姐：「會揀《女人唔易做》，係今年劇集中最好睇嘅，劇情感性又搞笑，比較輕鬆小品。綜藝資訊節目梗係揀《美女廚房》，超級搞笑，我成家人都好鍾意睇。」
董小姐：「我揀《法證先鋒》，鍾意睇啲查案嘅劇情，夠吸引。綜藝資訊節目就揀《向世界出發》，可以睇到更多世界各地唔同嘅事物。」
陳太：「我揀最近做緊嘅《肥田囍事》，胡杏兒增肥後幾可愛，應該花咗唔少努力，又講啲肥人感受。綜藝資訊節目就揀《美女廚房》，我自己都識煮嘢，但睇到啲後生仔女入廚好好笑，啲後生仔女真係要學吓。」
