工聯會惹火議員王國興如無意外會喺08年殺入新西玩直選，其實佢一向坐鎮工聯會新界支部，喺呢區參選都有優勢，但選舉都係要勤力先得，所以興哥都不敢怠慢，荃灣顯然係佢目標主戰場之一，所以佢噚日帶住八方同一班記者暢遊荃灣。
噚日興哥話畀大家聽，荃灣有好多好特色嘅老舖，希望政府重建荃灣之時，都可以留番呢啲咁有地區特色嘅舖頭，唔好只顧住拆拆拆，對佢哋趕盡殺絕，因為發展社區，都唔係單靠賣晒啲地畀地產商賺錢就得㗎嘛，興哥稍後仲會約見政府官員反映以上意見。
看來佢喺呢區成日蒲頭，做咗唔少工夫，所以啲老舖老闆見到興哥都好鬼開心，雞啄唔斷。表面睇嚟，興哥喺荃灣區都有唔少支持，其他新西候選人都要努力先至得喎。