練馬師岳敦提前退休返祖家，上星期三跑夜馬之時宣佈。鏡頭所見，岳敦面有無奈之色。十一月三日之《蘋果》馬經版八卦欄提到：「卓普咸、希斯到岳敦，走完一個又走一個，究竟香港馬圈係咪有乜問題呢？」
答案係，香港馬圈冇問題，有問題嘅係練馬師自己。現今香港馬圈，前列練馬師、騎師都屬於世界級，走咗嘅希斯就係呢一類。希斯因不幸父親、弟弟都先後身故，佢要返澳洲鄉下打理牧場，故此鬆人。但卓普咸與岳敦呢兩位英國紳士，練馬功夫屬老一派英國風格，功力約莫等於英甲嘅卡廸夫城，點同英超嘅曼聯、利物浦揮呀？岳敦得番十八隻馬，今季好難好難贏到十三場頭馬，與其到時畀馬會除牌，不如自己告退好過。
星期五上陸羽，樓梯居然塞滿人，原來二十幾個日本遊客在樓梯等枱，招牌老有一個好處，就係外地遊客慕名而至，無端端多筆生意。卒之上到去，見到馬主Ｌ，馬主Ｌ以前有馬擺喺岳敦馬房，讚岳敦好斯文，有英國紳士作風，但練馬亦好斯文，故此佢隻馬師老無功！為咗贏番啲養馬費，都要拉馬轉倉啦。
自馬會採取練馬師淘汰制後，練馬師唔勤力交際（碼實馬主）與勤力練馬（日日下午返馬房督師、晨早在馬場昅實晨操），稍為懶啲，成績就會不如理想，兩個月冇馬贏，馬主就會講俄文嘅嘞。岳敦急流勇退，完全係睇到長江後浪推前浪之故，與馬圈無關。佢今年52歲，雖然唔老，但與三十幾、四十零嘅練馬師比，精神上就老啲。
講完馬，酒莊Ｍ講番霍英東，佢話自己細佬哥時，喺修頓球場睇過有榮小型球隊霍老闆嘅英姿。酒莊Ｍ多年來對中共冇好感，八十年代之後先至改變一啲態度，現在就不時返內地遊玩。佢話不講政治立場，霍英東在中共最困難最黑暗時期一直擁護中共，被港英監視、排擠亦在所不惜，呢份勇氣十分難得，即使政見與霍英東完全不同都要佩服，當今一啲所謂愛國商人見風駛𢃇而已，與霍生完全冇得比！