食品股近排表現出眾，康師傅（322）公布業績前大炒特炒，雨潤（1068）迭創新高，海升果汁（359）亦正默默起步。隻股上周五升4.6%，收0.91元，有4仙進賬，唔怪得再引起散戶注意。
喺「香港討論區」內，網友simon7112上星期五留言：「我前兩星期小試買入呢隻嘢，平均價$0.85，隻嘢喺呢個價牛皮咗兩星期，今日下午成交增加，股價升到$0.91，我睇會過$1，短期內有10%回報，不過要留意成交量。」
easywin對呢隻股都有研究：「呢隻嘢一早已經貨源歸邊，爭在幾時開始炒，炒起上嚟，分分鐘升到你唔信。」
成本低市佔率升
海升從事製造同分銷濃縮果汁產品及濃縮果汁相關產品，以蘋果汁為主。今年9月頭公布截至6月底止中期業績，純利大幅倒退41%，主要係期內內地蘋果失收，令成本大漲。有見及此，公司已開始設立蘋果生產基地，同時進一步加強同核心供應商嘅策略聯盟，以保證原料供應穩定。
內地生產濃縮蘋果汁嘅成本低過其他國家，所以近年全球市場佔有率不斷上升，海升處於行業出口領先地位，生意有保障。
早排全球第二大鮮橙產地美國佛羅里達州的鮮橙收成大減，令橙汁期貨價格升到16年新高，競爭對手成本上漲，因而吸引資金換馬，刺激海升股價向上。技術上，隻股由5月高位1.27元碌到8月低位0.59元後，呢兩個月已開始重納升軌，股價一直企穩10、20同50日平均線之上，短期目標先睇1蚊，見有回吐可以投機買入，以20日線0.83元止蝕。
余文