男人柔聲說：「你啱啱入行呀？」女的怯懦點頭。「即係我係你第一個客咯噃，唔使緊張……」噚日八方直擊田北辰幫襯按摩中心過程，親耳聽到佢咁講！但大家唔好心邪亂諗，今次並唔係懷疑田二少骨場疏乎事件重演，只係佢身為僱員再培訓局主席，去主持該局新開嘅按摩中心開幕儀式，順便親身試吓啲按摩服務啫。
原來田二少膊頭好受得力，按摩期間不斷叫人哋要再大力啲，又話唔使錫住佢咁話。佢話最鍾意嘅服務係腳底按摩，一個星期要去兩次，間舖喺跑馬地，佢話打完高球去㩒吓腳板底好正喎。
唔怪得之噚日按完頸同膊頭，接受記者訪問之後，佢又急急返入中心按埋對腳啦，睇真啲，西裝骨骨嘅田二少着鞋唔着襪，可能都係為咗方便啲做腳底按摩啦。
間中心喺新世界中心地庫，係培訓局畢業學員實習嘅地方，腳底按摩45分鐘只係80蚊，頭肩頸30分鐘只係50蚊，確係好抵。