前規劃環境地政局局長蕭炯柱退休後，忙於做音樂義工，帶住佢嗰隊30幾年心血嘅香港青年音樂協會，一年兩、三次喺香港、又去內地，同啲玩中樂嘅小朋友搞吓大型嘅音樂會，等佢哋出吓大場面，又同有專業水準嘅青協玩crossover。蕭公子話，重點係透過呢啲大型表演，等小朋友喺音樂上有啲衝擊。
早前重陽假日，蕭公子同青協有新搞作，音樂義工隊跳出香港，遠征新加坡，與當地兩間中學啲同學仔crossover，八方一於跟隊去睇。呢兩間中學，一間叫做華僑中學，類似我哋嘅直資名校，另一間叫做歐南中學，有百年歷史咁耐，表演地點仲book咗殖民地年代百多年歷史嘅維多利亞劇院（VictoriaTheatreConcertHall）。
蕭公子透露，呢兩場表演，喺15個月前開始籌劃，由於重陽假期機票緊張，差啲搞唔成，好彩新航老細夠幫忙，青協一行近70人先可以包半架飛機，拎埋好重嘅樂器，越洋去表演。
兩場演出都幾乎賣個滿堂紅，青協嘅表演越來越好，兩間學校嘅小朋友，演出都好過排演。唔知係咪個古老劇院音響靚，蕭公子嘅指揮就越來越high越來越入化境，指揮壓軸曲目嘅《飛天》時，蕭公子放棄指揮棒，改用手指揮，好似打太極拳咁，成套拳法有柔有剛，睇到觀眾目瞪口呆，佢就完全融咗入去，完結嗰陣，只聽到好大嘅encore聲。
