眾人媽打、民政事務局前常秘李麗娟向來做事都親力親為，噚日下晝烈日之下，佢喺一個競步慈善比賽嘅「十人十一足」比賽中竟然縮沙，由佢個27歲嘅細仔劉堃（Chris）代母出征，同另外九個世叔伯合作，以「社區隊」名義出戰。
劉堃話，唔想媽咪咁操勞，同時成班都係男人，得阿媽一個女人，啲步伐未必齊，所以早幾日已經話代替媽咪，結果「社區隊」喺四支參賽隊伍中得第三，唔使包尾。李麗娟慶幸有個咁乖嘅仔幫拖之餘，亦講起前排結婚個囡囡劉盈（Cynthia）𠵱家仲喺馬爾代夫度蜜月，兩、三日後就會番嚟。
同場仲有前跳水皇后伏明霞，佢冇玩競步比賽，不過佢同八方講，4歲嘅大女同未夠2歲嘅細仔成日曳曳，都要教，令佢體驗到以前媽咪湊佢係幾咁辛苦。