又係老闆、又係夥計，同時又係廚房同洗碗，梁生同蘭英兩夫妻的百餘呎小小舖位，位於轉彎街角，九龍城廣場對面，二人一腳踢由朝做到晚無時停。做乜唔請人幫手？梁生話︰「小本經營，我哋賣嘅嘢又唔係貴嘢。」訪問時兩公婆做到無停手，二人各據一方，梁生負責爐頭炒飯及做粗重工作，而蘭英就不斷在烤爐上燒串燒，間中和熟客一兩句閒聊說笑，二人甚有默契。
每日開舖、整嘢食、收舖，已經成為梁生同蘭英生活嘅一部份，我多口問句︰「日日咁做唔悶咩？有無假放呀？」梁生︰「有氣力梗係繼續做啦，每日由10點幾開始做到半夜12點。」蘭英就話︰「我響屋企仲唔自在，好悶㗎，同埋啲客又叫我哋唔好休息，唔係佢哋無飯開喎！」已開業4年的蘭英，首兩年試過年中無休，現在亦只休農曆年，睇嚟梁生兩公婆真係無時停喎！
記者︰方綺君
攝影︰陳陶鈞
雞腿黃飯（包飲品）$21
店中至好賣，是午飯時段學生哥外賣首選。黃薑飯即叫即炒，加入了蝦米和香料，配埋隻啖啖肉醃過夜燒到香噴噴的雞腿，點食都咁好味。
豬頸肉、牛肉和火雞肫串燒各$5、台灣花枝丸賣$6，可拌上蘭英自製的泰式魚露辣汁或印尼沙嗲醬同吃，非試不可。
蘭英印尼小食（23828133）
地址︰九龍城福佬村道92至94號J舖