收到幾封讀者來郵，主要係問上星期日講「追保險賠償」內文提及嘅保險公司名字。呢樣怕唔講得，寫埋出嚟，唔知會唔會俾人控告。算嘞，請大家諒解。
另一位讀者好勞氣，M君每日睇《蘋果》網上版，最近不時見到陶傑、王冠一嘅專欄被「肢解」，文字變成破破碎碎，希望黎老闆留意吓喎。讀者M又唔滿意《蘋果》其他，唔該你自己寫封電郵畀黎老闆嘞，左丁山無意扮做申訴專員。至於你問到某報某專欄何解消失咗，點答呀，恕不置評。
秘書Ｖ知道政府推行強制性驗舊樓，為之擔心，佢現在住喺窩打老道舊樓，係單幢樓，近四十年樓齡，如果要強制性驗樓、維修，每伙要夾十萬八萬，唔係小數目喎，怎麼辦？秘書Ｆ就勸佢及早賣樓，買番大型屋邨舊樓，秘書Ｖ話：「舊樓換舊樓，有乜意思啫，我想買新樓。」秘書Ｆ話：「我都想買新樓，我去邊度搵錢嚟呀，我住響美孚，呎價三千，隔籬有新樓盤曼克頓山，聽講話呎價過萬蚊一呎。我諗過嘅嘞，最好嘅辦法係賣市區舊樓，買新界屋邨舊樓。市區樓嘅呎價，始終貴啲，一來一回，補差價唔使太多，或者唔使補㖭。」
秘書Ｖ問：「即使唔使補差價，住新界屋邨有乜好處，與驗樓有乜關係？」秘書Ｆ話好處就係管理與維修，佢有位同事陳主任住在沙田第一城，樓齡二十四，過去兩三年不斷進行維修，已經做咗四十七座，用咗成億銀，羊毛梗係出在羊身上啦，但居民完全唔多覺喎，因為每個月在管理費中收埋，沙田第一城好似有五十二座，住宅單位多，收收埋埋就夠晒數，居民覺得負擔不大，兼有管理處負責晒啲工程，勝於單幢樓居民也。
此乃從維修角度去睇。九龍市區好多單幢樓，業主立案法團嘅工程管理能力有疑問，集資能力有疑問，每伙平均負擔唔係小數，講維修實在十分頭痛，除非要求房屋協會代籌謀啦。秘書Ｖ諗咗一輪，突有所悟：「呢條新例之最大得益者原來又係大屋邨，以後大屋邨係強勢樓！」