涉嫌因為間諜罪俾北京判監嘅新加坡《海峽時報》記者程翔，雖然上訴審訊程序完咗，但係可能仲要拖多成個月先知結果，佢家人心急如焚，希望快啲還程翔清白，獲釋與家人團聚。程翔四兄弟姊妹，噚日出席港台節目，但係佢有個妹妹唔知乜原因，戴晒口罩，睇唔到佢真面目。
佢哋喺節目入面話，程翔嘅上訴勝算難料，近來都冇收到任何新消息，𠵱家只希望中央領導人重新檢閱審訊文件。佢哋由程翔律師口中得悉，程翔瘦咗20幾磅，又有血壓高同經常失眠，擔心程翔健康轉壞。佢哋早期都有探過程翔，程翔話搞到咁，都係因為對中國情意結太深。𠵱家佢哋兄弟姐妹最擔心家中兩老，驚佢哋過份擔心而病倒，咁就麻煩。