記得派拉蒙電影公司高調同湯告魯斯分手嗰時，震驚荷李活，所以由靚佬湯主演嘅《職業特工隊》系列，第三集變相成為佢嘅特工作品完結篇。其實即使電影票房不及前兩集，但第三集都有過億美元嘅票房收入，證明動作加靚佬湯，一樣大把Fans支持。今個星期碟場返咗呢套《職業特工隊3》，相熟老細話，煲碟友見佢出1區碟時，已經問定三區幾時出。所以都係嗰句：「有買趁手喇喂！」
記者：陸俊雄
《職業特工隊》拍到第三集，故事到底發展成點？今集係講美國最高機密特務組織（I.M.F.）發出指示，想啱啱結婚嘅湯告魯斯再次出山救人，點知當中涉及一樣叫「兔腳」嘅機密東西。靚佬湯救人不成，仲搞到周身蟻，俾人捉埋老婆要脅。一支公就話冇咩好怕啫，多咗個老婆就唔係咁講，靚佬湯誓要救番愛妻。
解構特工拍攝過程
由湯告魯斯擔任主角嘅《職業特工隊》系列，三集都有玩易容術呢一招。去到第三集，戲內更出現手提面具製作機，只要即時輸入影像數據，面具當住你面做個畀你。喺「特別收錄」內，觀眾就可以睇到，部面具機點樣製作出嚟。
此外，Bonus內仲會講一種「預視動畫」技術。其實喺拍攝《職業特工隊1》時，已經開始採用佢，到咗第三集應用更廣泛。咁係咪指CG場面？非也，佢係指拍攝前，預先製作咗套3D模擬動畫。攝製隊依住動畫，用真人拍多一次，如爆炸、動作場面就特別需要用到佢。睇落同預先用電腦拍咗套戲出嚟冇分別，你當然會問，咁咪用勁多錢？但靚佬湯會話你知，因為預視之後，拍起嚟更準確，變相慳咗唔少菲林錢。
四大必睇場景
嚟到第三集，爆炸場面、靚佬湯瞓身演出等鏡頭當然唔少，而每一集例必玩嘅高科技元素，到咗今集仲誇張，淨係玩變臉已經換到手軟！筆者仲揀選咗幾個心水必睇場景，可以話係高潮所在！
第一場：迫供倒敍戲
《職業特工隊3》嘅導演，就係拍電視劇《迷》、《特務A》而成名嘅J.J.艾布斯，作品鍾意玩時空交錯，玩到出晒名。喺《職業特工隊3》，第一場戲已經講靚佬湯同老婆俾人迫供，即玩時空交錯，等觀眾開波睇到一頭霧水。
第二場：出山救林茜
做特工教官嘅湯告魯斯本來金盆洗手，仲結埋婚，點知呢個時候上頭有單急嘅要佢出山，就係要救回特工後輩林茜。於是佢一行四個人，潛入工廠大廈展開大戰。同時亦係湯告魯斯入局嘅開始。
第三場：老湯炸不死
呢場戲係全片爆得最厲害嘅一幕，講湯告魯斯押犯途中俾人伏擊。觀眾會睇到直升機飛來飛去，又大爆炸，又飛彈亂射，典型荷李活級數製作。當中有幕炸到湯告魯斯彈埋架車度，仲唔用替身，大家一定要睇睇。
第四場：蜘蛛俠擒窗
呢幕係講湯告魯斯時間無多，為救老婆要去偷樣叫「兔腳」嘅機密東西。於是佢就喺三座高樓大廈上空，用繩索飛來飛去，試圖從天而降避開守囗。睇落仲以為蜘蛛俠吐絲，好盞鬼！
DVDPro（23326326）
