睇得波多，發覺做領隊嘅先決條件係足球智慧要夠高，同埋要識玩心理戰，賽前賽後都要識發表言論去「妖言惑眾」，呢方面最出位者就莫於摩連奴喇！我覺得佢做得幾啱喎！周中歐冠盃車仔作客魯營和波而回，令士氣大增，賽後佢仲話下一輪要放分畀雲達，等巴塞無機會出線！唔知𠵱家雲達同巴塞教練聽完後會點部署呢？
有時領隊公開講話又未必次次用嚟嚇對手，好似今季真係衰到貼晒地嘅曼城，個領隊就話睇嚟一月都要入番啲新兵返嚟代替𠵱家嗰啲，果然上場對米堡即刻奏效反彈贏波。所以話，做領隊真係要識揀場合「多嗲」㗎！
投注者要小心分析
投注者亦有機會俾呢啲「妖言」所累，剛過去嘅足協盃，利禾奴個教練就拍晒心口話會贏，點知佢對住塞爾維亞實力低幾班嘅柏廸遜居然和波收場！呢兩晚唔少球迷都打入嚟PHONE波熱線哭波喪話受騙！個個領隊賽前都話好想贏波㗎啦，我呼籲各位投注者真係要小心呢啲「妖言」呀！
WENDY
由歐國盃EuroBabes，變身球彩台受歡迎主持。