對於近日多個演唱會銷情欠佳，連殿堂級的徐小鳳個唱一樣未能爆滿，去年有份主辦徐小鳳個唱的耀榮娛樂老闆張耀榮，昨日接受電話訪問時說：「當演唱會愈開愈濫嘅時候，觀眾多咗選擇，當然唔會個個演唱會都買飛睇，其實製作一個演唱會唔係咁容易，一定要先了解市場動向。歌星自己搞演唱會，可能佢哋以為真係搞一個演唱會係好簡單嘅事，但唔做慣係唔會明白，製作質素係好緊要，因為搞得好，觀眾先會對主辦公司建立出信心，所以有時我哋蝕本騷一樣唔可以慳製作。」
酬金索價高
據悉去年耀榮、英皇與東亞三間公司合作主辦徐小鳳演唱會，原本今年有意添食，但因小鳳姐開出的條件太高，除酬金索價高外，又要求保證主辦15場個唱，超出他們預算的場數，結果三間公司均放棄主辦。
記者向張耀榮求證時，他說：「其實今次主要係由英皇負責同小鳳傾，所以我唔知情況，只知三間公司會共同進退。我唔知小鳳啲飛賣成點，但𠵱家只係剛剛賣幾日，唔可以咁快作定斷。」
採訪：葉雪