早兩日行過灣仔嘅VolvoShowroom，睇吓部新款S80有幾正斗之餘，仲拎埋最新嗰本《LIV》返屋企慢慢睇；今期真係好過癮，講嘅並唔係用幾部Volvo汽車嚟一次層層叠，而係除咗前半部介紹Volvo自1927年成立至今，呢79年嚟嘅廠方Logo演變歷程；但後半部就更加抵死，主角係一班用作撞擊測試嘅假人粉墨登場，一男一女假人出街拍拖，仲要着得好靚咁去餐廳撐枱腳㖭！
記者：鄭達基
攝影：黃子偉
副主席落場介紹新車
向前揭多幾頁，就睇到一個同樣咁吸引嘅Topic，主角係Volvo汽車副主席HansWikman先生親自落場，為大家介紹新一代XC90，佢唔單止大讚新車個Look同車廂鋪排好正斗，而且仲話佢好啱女士揸㖭！咦，有副主席落場Sell埋一份，咁肯定有信心保證啦！
