金像影帝丹素華盛頓（DenzelWashington）兩年前同《壯志凌雲》（TopGun）導演東尼史葛（TonyScott）合作過火爆有型嘅《鑣火》（ManonFire），之後又再次攜手合作新片《時凶感應》(Dejavu)，今次仲有《魔盜王》(PiratesofCaribbean)系列招牌監製謝利畢咸馬（JerryBruckheimer）助陣，一花16億港元唔止炮製火爆動作片，仲係有浪漫愛情嘅科幻電影，真係估佢唔到！ 撰文：戶川惇
導演東尼史葛（TonyScott）喺影壇成就雖然冇阿哥列尼史葛（RidleyScott）咁巴閉，但佢多年嚟拍攝嘅動作片入型入格，冇乜失手，好似《浪漫風暴》（TrueRomance）已經係唔少影迷至愛。佢兩年前同丹素華盛頓合作嗰套《鑣火》一樣拍得好有style，今次佢哋再次碰頭，自然又會擦出新火花，本月30日本地上映嘅新作《時凶感應》仲竟然係套充滿火爆、懸疑同浪漫嘅科幻動作片！
渡輪爆炸生奇案
電影以一艘渡輪喺美國獨立日發生災難性大爆炸開始，丹素華盛頓飾演嘅聯邦調查局調查員發現呢宗懷疑恐怖襲擊，原來同一宗兇殺案有關連。
丹素華盛頓仲憑政府機密高科技儀器，穿越時空，回到四日之前進行截擊，企圖拯救兇殺案中嘅女死者同制止驚天陰謀爆發，佢竟對案中素未謀面嘅女死者有一種似曾相識嘅感覺，後來仲墮入愛河。
班底強勁有特色
呢套片幕後班底強勁之外，幕前亦巨星如雲，連《受難曲》(PassionoftheChrist)主角占卡維素（JimCaviezel）同《俠聖》(TheSaint)嘅韋基馬(ValKilmer)都有份演出。
套片嘅場面拍得唔比《鑣火》遜色，色彩同鏡頭處理都好有格調，仲有好爆炸嘅場面，大家不妨上網（ http://dejavu.movies.go.com/）睇睇預告片驗驗貨啦。