大家對烏冬一點也不陌生，原來日本人食烏冬是不加任何配料的，熱烏冬得個上湯，冷烏冬亦只有一碗豉油。原來每碗烏冬只有約200卡路里及2克脂肪，在眾多麵類中屬健康之選。最近專做讚岐烏冬嘅赤丸製麵所登場，低卡之餘，仲煙韌彈牙，怕肥嘅女仔都唔怕食！
記者︰方綺君
攝影︰何家亮
Model︰Algie
日式自家製正宗讚岐烏冬
用北海道出產嘅麵粉製造，不可存放太耐，故每日由中央工場新鮮製造再運到店中加工，因此讚岐烏冬比其他如稻庭烏冬嘅口感更煙韌彈牙，絕對不含防腐劑或其他色料，加上麵粉嘅密度高，放落湯都不易發脹，影響口感。
日本人食烏冬唔會有餸
日本人食烏冬習慣乜都無，不過香港人就剛好相反，食乜都要多款大大件，食多咗都唔知。尤其係炒烏冬，屬高油份、高卡路里的食物，真是少吃為妙。新開張嘅赤丸製麵所，其讚岐烏冬採用北海道麵粉每日新鮮製造，又不含防腐劑或其他色料，當然份外健康。不過模特兒Algie話︰「我都係嫌淨烏冬好齋喎！」唔緊要，覺得齋烏冬太單調，店內亦有超過20多款配料如天婦羅和小食自由配搭，好似食車仔麵咁鍾意食乜放乜。
原創撈烏冬點撈都得
怕煩唔想揀，亦有另外選擇，原創撈烏冬是由集團日籍食品部總監親自來到香港監督研製。撈烏冬共有5款：親子滑蛋撈烏冬、滑蛋吉列豬扒撈烏冬、鴨胸滑蛋撈烏冬、天婦羅炸蝦撈烏冬。我覺得麻婆豆腐撈烏冬夠噱頭，可能知道香港人經常以麻婆豆腐撈飯，今次來個大突破，不過撈烏冬雖然無湯，但係啲醬汁真係幾好味。
熱湯烏冬及冷烏冬各$10 加大$15
來到赤丸製麵所當然要食主打的自家製讚岐烏冬，無論冷熱烏冬的正常份量都是180g，加大有270g，熱烏冬加鮮上湯暖胃；冷烏冬加入冷面豉油和wasabi好煙韌。若覺得淨烏冬太齋，店中有自選配菜，每款由$7起，Algie就選了天婦羅炸蝦及碎海藻。
麻婆豆腐撈烏冬$30
中國名菜之一麻婆豆腐撈飯就食得多，今次撈烏冬，麻婆豆腐內有大蒜粒、豆腐、薑茸、紅椒粒，份量多足夠撈一個烏冬。
天婦羅丼定食$38
日本人食丼份量好多，通常一個飯再加一個烏冬。呢個丼一定有天婦羅飯（內有冬菇、魷魚和蝦天婦羅各1件），配迷你烏冬同日本鹹菜。
炸野菜蝦拼湯烏冬$30
炸野菜蝦餅最好熱辣辣即刻食，外脆內軟有大大件海中蝦3隻，甘笋粒、洋葱粒、冬菇粒、青豆混入粉漿，咁香口我覺得最受小朋友歡迎。
牛肉咖喱湯烏冬$43
牛肉咖喱材料全來自日本，香滑咖喱湯的稠度與杰醬料有得Fight，可以當汁撈，肥牛份量不少，絕對貨真價實。
食客話好彈牙
搵食攻略
赤丸製麵所（青衣店）（24352099）
地址：青衣青衣城128號舖
交通︰青衣地鐵站A出口
營業時間：11:00am-11:00pm
座位：約60個
人均消費︰$25-$40