地產經紀良莠不齊，個別為求促成生意，無所不用其極，對業主同客人隱瞞資料，都時有所聞，形象一向麻麻。
然而，亦有好人難做的例子，值得大家去反思。
話說網友M記有位經紀朋友，早前遇上一個麻煩租客，想屈業主包埋微波爐，但業主唔肯。「我個friend為咗做成生意，搵部微波爐番嚟，呃個客話業主讓步。本來都無事，好衰唔衰，部微波爐壞咗，結果件事被揭發，𠵱家租客同業主都投訴我個friend，話佢講大話。我想問，你哋覺得我個friend係咪做錯呢？」
在《Uwants討論區》將軍令回應得最直接，「係，仲要係自己攞嚟！」initalcs就附和：「呢啲叫好心做壞事。」
另一邊廂，有數位網友不值，哥奧無奈說：「唉……自己落袋得幾百……何苦呢！」billyskf深表同情，「做唔到咪算囉！何必咁做呢！呢行已經好難做，何必加重自己負擔。」
違規會被釘牌
行內人指出，促成一單租務生意，僅收一個月租金作佣金，經拆佣後，經紀所得很少，M記朋友送微波爐做法太進取，而且事件始終會被揭發，不鼓勵他這樣做，嚴重者甚至會被釘牌。
行內人坦言，業主與租客經常有爭拗，惟普遍與經紀無關，例如業主唔畀養狗，唔想租予有小朋友嘅租客，但租客例牌講大話，甚至連經紀都呃埋，結果租出以後，業主大鬧經紀。
不過，他奉勸業主，既然已將單位租出，應盡量與租客保持良好關係，否則租客發爛渣，不愛惜地方，將內櫳搞到殘破，損失更大。
報料電郵：[email protected]