美國投資理財網站《MotleyFool》，係由DavidGardner及TomGardner兩兄弟創立。網站口號係：「教育你、讓你開心、使你致富」，即透過豐富兼娛樂性嘅方法，教育投資者學習點樣理財致富，因此網站非常受投資者歡迎。
網內寫手RexMoore認為，投資者即使揸着藍籌股，亦要不時評估自己嘅投資組合，察看當中有冇危機出現先兆，影響股票前景；所以佢向投資者分享3個沽貨訊號。
第一：自私管理層
一間公司最差嘅情況，就係管理層只顧自己口袋裏嘅錢多過公司創造更多商業價值。究竟投資者有乜嘢蛛絲馬迹可尋呢？不妨留意高層有冇收取過高薪酬、頻繁嘅內幕交易出現及市場佔有率下降。
第二：失去競爭優勢
名牌公司如百事，在市場上擁有強大的競爭優勢，因為消費者不介意多花幾毫，去購買該公司飲品，故此能為公司及股東帶來巨額回報。所以，當你發現手持股票嘅公司，逐漸失去市場議價能力，客源被攤薄、市場佔有率不斷下跌，就係反映公司正失去競爭優勢，係時侯沽出股票。
第三：不穩財務狀況
投資者需注意公司盈利增長，營運支出、現金流入、營業額變化以及資產負債表盈餘，如果有兩項以上的負面情況出現，就係公司財務響警號。
以上嘅情況投資者不難發現，只需多留意公司新聞及最新年報，就可評估自己嘅投資組合，以防損手，從而獲得較理想嘅投資回報。