何韻詩在演唱會上穿起梅艷芳式的「師徒裝」，登時上身一樣，門生對老師耳濡目染的敬愛固然有助入戲，猶如餅印的衣箱對戲寶神髓的重現亦有功勞，我覺得同一場面再演一次，換了是阿詩平日愛穿的T恤牛仔褲，未必有這種「百變梅艷芳再展光華」的舉手投足，再一次證明服裝的確賦予穿者能量，你屋企樓下看更除低制服都冇咁聲大夾惡啦。
VivienneWestwood認為「Youhaveamuchbetterlifeifyouwearimpressiveclothes」，我當然贊成「着好啲、活好啲」的理論，但實戰多年，不忘兩頭蛇地留些票數給「時裝奴隸」這種看法，人擁有甚麼就得服侍甚麼，買了靚衫，有時自有另一些壓力，購物療法的副作用。
壓力一：怕整爛
所謂靚衫，一般不會穿得你舒服自在，要隱惡揚善有時就得違反自然定律，將你本來的體態或擠壓或僭建，總之一定有點阻手阻腳，這樣的覺悟，第一次着起飲衫那天，早已有之。
然而忍得住肉身的不安，還得應付心理上的步步為營，一件你覺得靚的衫，不論平貴，爛掉了自然肉痛，偏偏美麗通常脆弱，例如刺繡、雪紡、真絲、皮革都並非永不磨損，真不明白最華美的晚裝和婚紗為甚麼都是拖地的？我連穿了條好樣一點的褲子都時時擔心褲腳會被自己拖爛，心愛的針織品更是神經緊張地處處提防勾線走紗。我常說人生終極夢想之一是去巴黎做件HauteCouture，真的到手的話其實未必捨得着，我當然懂得瀟灑之道：幾靚都好，着得出街，預咗整爛，但明白一件事，真正講得出做得到又是一種境界，你又得唔得吖？
當我講句風涼話，爛命一條有爛命一條的自在。
壓力二：Noplacetogo
有場合要去而冇靚衫可着固然悽慘，太多靚衫而冇場合可去更悲哀。
靚衫不是話有就有的，平時要買定，否則今晚突然有個重要約會，下午請半日假去搵衫也未必搵得切。事實上，早兩星期通知，有時也未必撞得中手神，結果還是「I'vegotnothingtowear」，置裝其實需要廚師的運氣，入貨不夠慢客，入貨太多賣不出放着腐壞，盞嘥。我痛恨自己季季買了大堆衫，結果季尾時發現存貨太多，所以迫自己出席一些本來不打算出席的場合，與沒有趣的人談話受盡折磨，只為着一着某件勢必很快過時的衫，為了唔好浪費件衫，結果浪費了自己。
還有一種運氣我也很欠缺，總是覺得自己着得好靚嗰日，去到party才發現識欣賞的人一個也不在，「早知今日唔好着咁靚啦！」；另一天另一個party，估計是碎料，專登留力唔着咁靚，結果目標觀眾喺晒度！
抑鬱症就是這樣來的。
壓力三：襯錯嘢
愈華美的衣服愈具「一次性」，翻炒鈦不能！
逛來逛去買不到靚衫出席緊要場合煩，買到了又煩。件衫靚啫，唔等如唔使整體配合，只得上截或只得下截的單品，固然要人踏破鐵鞋尋回失落的另一半，就算是女人們十皮嘢買條絕世onepiece裙，結果梳錯頭化錯妝戴錯首飾襯錯鞋一樣功虧一簣，最唔抵的是本來好靚的一件衫好像被糟蹋掉了，因為人言可畏的「一次性」，未必有機會重新襯番靚再出場討回公道。
年少無知時常常笑人着衫照搬catalogue的totallook，現在才明白原廠衫褲鞋襪fullgear上陣，有時不失為一種省時又不敗的保險，否則靚衫一件，被自己親手襯死了，又可以發邊個脾氣？
講起來，擁有靚衫原來咁大壓力，不如明天開始買些核突衫算了──咁又唔得！我呻吓啫！
Textby黃偉文
黃偉文自我簡介
填詞人，其實最鍾意買嘢，最憎寫字，星期日盡可能唔寫字，去買嘢。
