有一排冇見嘅前特首夫人董趙洪娉，噚日出席一個關注德育嘅研討會，由於大會邀請咗北京中央教科所所長朱小蔓教授嚟作主題演講，所以現場多數用普通話發言，點知董太啲普通話講到唔鹹唔淡，最後索性講番廣東話，聽到朱教授側晒耳，間唔中要勞煩旁邊嘅嘉賓做繙譯，不過朱教授仍然好有禮貌，一直保持笑容，難得！
董太話香港幾十年前冇講德育，嗰陣佢湊住三個讀上、下晝班嘅仔女，已經搞到天翻地覆，不過佢就話做人點都要與時並進，亦都明白𠵱家德育嘅重要性。被問到會唔會去霍英東嘅喪禮時，佢即刻語帶哀愁咁話會去，又話佢老爺董浩雲同霍老好熟，大家認識好深，霍老逝世係香港好大嘅損失。