舊年1月，超人李嘉誠將出售加拿大帝國商業銀行近5%股權套現所得嘅12億加元（約80億港元），部份撥入「李嘉誠（加拿大）基金會」作為慈善用途，一時成為佳話。
最近加拿大《環球郵報》（TheGlobeandMail）同李超人埋單計數，發現呢個基金會大部份嘅捐款都唔係用喺加拿大。
該報記者翻查基金會05年度財務報告，截至去年底基金總資產2.57億加元，舊年捐咗5,340萬加元，其中4,730萬加元捐畀香港大學，490萬加元去咗美國加州柏克萊大學，剩番120萬加元至係畀多倫多聖米高醫院基金，似乎唔係好益加拿大。
基金會主席陸法蘭話，加拿大同香港嘅李嘉誠基金會其實係一齊運作，不過將來會回饋多啲畀楓葉國咁話。唔知香港李嘉誠基金會條數，又有幾多係捐畀香港呢？