【本報訊】一張的士司機執照，加一萬元按金，話知你是黑社會大佬，還是案底纍纍的釋囚，都可以揸的士搵食。業內人士慨歎，車行為了搵真銀濫出租的士，的士司機質素愈來愈失控，行業形象也被拖累了。記者昨日前往被捕的士司機的車行，負責人拒絕回答任何問題。
有按金有執照可租車
造成的士司機良莠不齊，與市場運作有莫大關係。市區的士司機聯委會主席郭志標指出，的士司機向車行繳付的租金，半年來上升了一成：「做開嘅行家頂唔順，惟有轉行。剩番嘅的士，車行為咗有錢收，求其有的士司機執照嘅都租畀佢哋，愈租愈濫，理得你租架的士來做乜。」
的士司機考牌不難，凡持有私家車或輕型貨車駕駛執照三年或以上，就可以報考的士駕駛執照考試。運輸署發牌不會問案底，也毋須路試。以前大部份的士還是由私人擁有，很少由車行代理出租，新人想入行揸的士，必須經行內人介紹，車主也會認真要求新手「試車」，在車主面前展示駕駛技術。到了近年，七成的士都經由車行代理，固有行規已無人理會。
「以前新人入行要人介紹，咁佢嘅底細，大家都一清二楚，做錯咗嘢，車主都可以捉個介紹人來詐型，叫做有個保障。𠵱家？車行最緊要有生意做，個司機揸架車去做違法嘅事都唔會理！」郭志標說：「只要個的士司機交低按金（六千至一萬元），就可以揸架車走。衰啲講句，你撞咗架車重好，可以充公埋你啲按金。」
兩年前開始，不少客貨車及廠車司機轉行揸的士，沒有人跟他們提過的士的行規，以前不可能發生的事，都可以發生了。有個傳聞說，一名的士司機眼見一架的士被賊打劫，他居然在側邊停下來，接走賊人。
昨日肇事的士登記車行位於土瓜灣，但負責人表示該部的士已轉租予西灣河海寧街另一車行，記者向該車行負責人查詢，被他拒諸門外。
林過雲案少人搭的士
郭志標慨歎，的士司機犯案，會嚴重打擊行業形象。最深刻的例子，就是80年代「雨夜屠夫」林過雲支解女乘客的奇案：「嗰段時間，好多女乘客剩係會搭佳寧車隊嘅的士，再唔係就專揀啲年老嘅的士司機先敢上車，就算上到車，都會坐近車門，準備隨時跳車。嗰時好淒涼，好多人都唔敢搭的士。」
97年10月，一名的士司機企圖姦劫女公關不遂，將她推下的士毆打，復開倒車將她撞至重傷，同年11月，該的士狂魔故技重施，將另一名女乘客箍暈企圖打劫，幸市民發現報警將他擒獲。
