秋天萬歲！相信大家都感受到秋天嘅亁爽同舒服！計我話一到秋天就點樣都爽。話埋你知，呢個時候去行山仲爽呢！今日就介紹一條方便又就腳的行山徑：寶雲道，行山之餘仲可以順道參觀博物館睇埋古迹㖭！
記者：蘇振鵬 攝影：陳盛臣、蘇振鵬
起點就腳唔使煩
寶雲道有幾就腳？起點在馬己仙峽道近蒲魯賢徑的一段路中，由金鐘地鐵站行約二十分鐘就到，或者坐小巴直到又得，唔使咁舟車勞頓。而終點在司徒拔道、大坑道及黃泥涌峽道交界，有巴士和小巴站，眨吓眼就落到灣仔。
行山路途太崎嶇又未必支持得住！偏偏寶雲道就唔難行，計埋中間的寶雲徑全長約5公里，全條柏油路，兩個鐘頭實行得晒。咪睇佢臨近巿區就唔夠一般行山徑咁好環境，實則它建於山腰上，可以鳥瞰灣仔和銅鑼灣全景，步行徑的兩旁亦種滿大樹，太陽光從樹葉縫隙裏透出來，吸口氣都零舍清新。
出發
中段分叉向上行睇警隊
喂，又話有嘢睇？冇錯，喺寶雲徑中段的灣仔峽道交界，可選擇向上行，經甘道去參觀警察博物館，睇睇香港警隊的裝備及歷史。嫌寶雲道太易行唔夠「毅行」嘅朋友，就更加唔可以錯過往警察博物館的一段斜路，莫講話由下行向上，只是由上面行番落寶雲徑，行快少少個人都向前傾煞唔切掣！
警察博物館（28497019）
地址：香港山頂甘道27號
交通：可由寶雲徑步行至灣仔峽道、司徒拔道與山頂道之間的交滙處，或乘新巴15號（由交易廣場至山頂），在司徒拔道與山頂道之間車站下車，然後沿甘道方向行。
開放時間：星期三至日9am-5pm、星期二2pm-5pm、逢星期一及公眾假期休息
備註：團體參觀請先致電預約時間。
吹風人頭姻緣石
除咗向上行，你可以選擇沿灣仔峽道向下行到皇后大道東參觀環境資源中心，但建議唔使心急住，事關呢處可以行完寶雲道先再睇。𠵱家繼續行寶雲徑去睇姻緣石，順道催旺自己嘅姻緣運，拜完神繼續行埋寶雲道睇風景。
一級歷史建築20年代藍屋
行完寶雲徑，就可以搭小巴24M落灣仔欣賞古迹。好似位於石水渠街、建於1920年的藍屋，及以包浩斯風格建成的灣仔街巿等，已經夠你駐足欣賞好一陣子。而剛才說到的環境資源中心，亦位於附近。
灣仔環境資源中心（28932856）
地址：灣仔皇后大道東221號（灣仔郵局舊址）
交通：由灣仔地鐵站A3出口往皇后大道東方向步行可到
開放時間：星期一、三至日10am-5pm、星期二及公眾假期休息
備註：周日設有環保手工樂趣坊（時間：星期日10am-11:30am、2:30pm-4:30pm），教授利用鋁罐、廢紙或膠袋等材料製作手工，費用全免，毋須預約。
搭車要點
去程：由金鐘地鐵站進入香港公園，上行至視覺藝術中心往堅尼地道的出口，往聖保羅中學旁邊的石級去到麥當勞道，再經石級上；或者纜車徑石級直上。或搭由中環天星碼頭至寶雲道的專線小巴9號（$5.3），於寶雲道與馬己仙峽道路口落車。
回程：可搭來往金鐘至畢拉山的小巴24M（分段收費$4.2）落灣仔，或搭來往中環（交易廣場）至山頂的巴士15號（$9.2）或來往銅鑼灣天后至山頂的巴士15B號（$9.1）
行山裝備要齊全
SourceHydration水袋$145
採用類似密實袋的設計，比一般水袋更易清洗。
NIKKO行山棍$190
既輕身，又有避震功能的行山棍，拎住行山一流。
SNOWTRAVEL優閒帽$185
採用防UV物料，既輕身又可有效阻擋紫外線。此外還有布料可附加於帽子上，連頸部位置也得到保護。
FIVETENT恤$75
採用快亁物料製造，密度比普通棉質物料衫低，入風易，排汗快，唔會行到成身臭崩崩。
香港攀山訓練中心（27706746）
地址：旺角花園街1K地下及1樓