陳奕迅真藝術家
「我早前喺國內做嘢，夜晚睇江蘇台播劉德華同梁朝偉做嗰套《鹿鼎記》，劇中飾演海公公嘅劉兆銘真係好犀利，佢演一個盲太監，要表演雙目失明嘅眼神係好難嘅，但係佢完全做到嗰種惑覺，覺得佢真係一個藝術家，所以佢係我最想合作嘅前輩。」最喜愛的綠葉：劉兆銘
古巨基提點後輩
「95年我拍無綫嘅《皇家反千組》，劇中第一次有機會同羅蘭姐合作，當時我冇乜演出經驗，佢都好照顧我哋呢啲後輩，份人又有耐性又細心，經常有提點我哋唔少演出嘅竅門，所以我對佢嘅印象好深刻，事隔咁多年我都好希望有機會再同佢合作。」
最喜愛的綠葉：羅蘭
方力申魅力無限
「我最鍾意嘅演員係胡楓，我都有睇佢做嘅粵語片，我覺得佢每個動作、就算行路都係風度翩翩，真係好有型㗎！好少有人真係學似佢舉手投足都咁有魅力，唔係一朝一夕可以學到。如果要搵一個前輩級演員合作，我當然想同修哥合作啦，喺佢身上偷師。」
最喜愛的綠葉：胡楓
張敬軒演技精湛
「如果有機會拍劇或者拍戲嘅話，我最希望同廖啓智合作，因為我覺得佢真係好好戲，演技好過好多一線演員。智叔不論做老竇、黑社會，甚至精神有問題嘅角色都做得好好，睇得出佢每一個角色都好用心去做，係一個好專業嘅藝人。」
最喜愛的綠葉：廖啓智
王菀之莊諧並重
「我好想同羅冠蘭合作，可能佢係做舞台劇出身嘅關係，我覺得佢做戲嘅表情好仔細，佢啲眼神、嘴角都好似識做戲咁。同埋有時要佢做一啲比較儍大姐嘅角色佢都唔介意，演起上嚟你會feel到佢豁咗出去，做啲風趣嘅角色都係難唔到佢。」
最喜愛的綠葉：羅冠蘭
楊千嬅容易入戲
「我就最欣賞羅蘭姐，佢做戲真係好投入㗎！演修女就似修女咁和善，演龍婆就覺得佢好詭異，而且每個角色都好深入民心。加上佢好快就可以投入角色，真係唔易做到。我都想同佢合作，有時好娘嘅對白，但係喺羅蘭姐演繹之下，又會好潮，真係值得研究吓。」
最喜愛的綠葉：羅蘭
湯盈盈充滿能量
「最鍾意嘅前輩演員就係胡楓，佢個人好有energy，同佢拍檔帶畀你好多動力，而且佢做親嘅嘢都會畀到你新鮮感。佢又唔會係文靜型，見親佢都開心。講到最想合作就係余慕蓮，我都有睇佢做嘅戲㗎！真係做得好似，好似《神鵰俠侶》我就覺得佢做得好好。」
最喜愛的綠葉：胡楓
關心妍形象多變
「咁多個前輩入面，我最欣賞係譚炳文。佢每做一個角色都好唔同，好似早排佢喺《黑社會》入面做黑社會大佬，無諗過佢做呢啲角色都咁OK，好有嗰種威風。但最想合作嘅前輩，就係陳寶珠喇！以前曾經有人話我似佢，最好一齊做《女殺手》啦！」
最喜愛的綠葉：譚炳文
採訪：王連連、黃君怡、馬建華、李珮洳
