【上海直擊】日本人氣偶像木村拓哉同鈴木京香噚日喺上海車墩影視城，為日本TBS電視台創立55周年重頭劇、改編自現年81歲嘅日本著名小說家山崎豐子作品嘅《華麗的一族》趕戲，呢套劇係木村自拍完《Engine》後，近兩年以來拍攝嘅新劇。木村喺劇中扮演一名70年代銀行界巨子嘅兒子，幫父親管理旗下一間鋼鐵廠，不過木村同父親不和，最後木村仲會自殺收場，痛錫佢嘅影迷一定會很傷心。
煲煙等埋位
噚日上海嘅天氣好好，氣溫約10零度，木村朝早8時已抵達現場做準備，見佢專登為新劇剪短四吋頭髮嘅新髮型，襯埋西裝俊俏有型，佢仲揸車載住扮演女伴嘅京香出入，鏡頭前後二人不時交談，唔知係咪研究劇情？而現場約有10名影迷聞風而至，但都乖乖企埋一邊，冇騷擾偶像。
後來木村拍攝獨自嘅戲份，見佢喺一啲搭建成銀行嘅建築物前行來行去，估計劇情係交代佢去銀行辦理公事，而等埋位時，木村就不時企埋一邊抽煙同飲咖啡提神。
採訪、攝影：盧健
