佘詩曼早排自爆要交七位數（過百萬）稅，大呼肉赤，一眾無綫花旦當然唔執輸要自抬身價，前晚廖碧兒出席活動時就話自己都要交過百萬稅，稅局淨係收無記姐仔嘅稅金，都已經好和味！
陳法拉、廖碧兒同內地名模熊黛林等分別以性感露背或谷胸出席中環嘅芝柏錶酒會，着單肩裝嘅廖碧兒顯得密實失色，阿媽唔准性感？佢話：「都唔係㗎，都露咗少少膊頭位。今年台慶一啲壓力都冇，因為冇提名，拍咗幾輯劇都冇出，反而廣告就多啲。」豈非要交重稅？有冇七位數字？佢話：「都有㗎！收入我都係由媽咪儲起，因為入行頭兩年已經買咗樓。」
熊黛林谷爆撐場
同場熊黛林一身RobertoCavalli黑色晚裝配13萬鑽表，失蹤一排嘅佢好身材重現，更無遮無掩咁坐的士到場，問佢怕唔怕被人昅，熊黛林就話：「我想不會吧，幸好我從來沒有給人輕薄過。」
陳沛嘉除咗去芝柏錶酒會外，之後仲捉咗男友彭文堅，去灣仔支持自己有份寫嘅愛情小說，雖然佢話書內寫咗自己初戀，但男友都仲畀3000蚊買限量版新書，咁識做，陳沛嘉即時獻吻答謝。
另外，廖碧兒噚日出席喺中環舉行嘅法律週2006，擔任法律大使嘅碧兒話：「好開心可以擔任法律大使，等我可以認識多啲法律問題，其實有時我哋藝人無意中俾人侵權都唔知，我都試過被人用嚟做某樣嘢嘅生招牌。」
採訪：吳天慧 攝影：陳慧安
