今年雙春兼閏月，豪門婚事特別多，噚日地產界有大喜事，新鴻基地產副主席郭炳江嫁女，親家老爺係著名建築師呂元祥，認真門當戶對。
郭炳江長女郭曉妍（Noelle）與呂元祥兒子呂慶耀（Bryant）拉埋天窗，噚日一對新人早上11時先喺中環聖約翰座堂行禮，晚上於灣仔會展大排筵席100圍，宴請親朋及名人富豪。由於郭家生意大，新地將於下月11日，再喺國際金融中心嘅四季酒店宴請旗下員工飲喜酒，老闆嫁女員工有餐食，咁嘅老闆真係唔話得。有傳一對新人婚後將以新地山頂豪宅倚巒作新居。
選平治作花車
噚日大會派出50個粉紅呔助手，以及20多個女公關在場打點，可惜到場採訪嘅傳媒比預期少得多，只得二、三十人。郭家噚日貫徹一向低調作風，另闢後門入口位，讓其他低調來賓進場，相信郭炳湘夫婦、郭炳聯夫婦都係由後門出入；花車也貫徹低調氣派，選用近百萬嘅BenzS680房車，而唔係一般超豪嘅勞斯萊斯或Bentley等名車。
11時正，打白底七彩波波煲呔嘅郭炳江帶同新娘到場，榮升外父，郭炳江心情極靚，全程笑不攏嘴企定任影。甚少公開露面嘅郭曉妍一襲長拖尾喱士婚紗，清麗可人。最搶眼除咗新娘嘅燦爛笑容外，佢嘅古董鑽石頸鏈、手上嘅巨型金珠戒指同樣搶鏡。到場觀禮嘅嘉賓包括特首夫人曾鮑笑薇、東亞銀行主席李國寶夫婦、貿發局主席吳光正夫婦、終審法院首席法官李國能等。晚上喜宴更加冠蓋雲集，如恒地主席李兆基同細仔家誠（不過唔見徐子淇）、長實副主席李澤鉅、中信泰富主席榮智健、賭王個女何超瓊、超鳳、小賭王何猷龍同老婆羅秀茵、廸生創建主席潘廸生夫婦等。
財金官員畀面
官場更加不得了，一向同地產商友好嘅房屋及規劃地政局局長孫明揚夫婦梗有到，仲有財政司司長唐英年夫婦、財經事務及庫務局局長馬時亨一家、金管局總裁任志剛、單拖嘅特首辦主任曾俊華、民政事務局局長何志平同老婆胡慧中、教統局局長李國章、前一哥曾蔭培等，真係要好小心避免被人話官商勾結。
郭炳江是本港著名地產商，其實親家老爺、著名建築師呂元祥也甚有來頭，剛當選為07年度新任香港建築師學會會長，作品包括山頂凌霄閣、亞洲國際博覽館、香港廸士尼酒店等。一對親家合作多年，例如近年嘅農圃道18號住宅樓宇。
