好多人都鍾意買番三幾隻大藍籌傍身，無他，因為理論上係夠穩陣，之不過係咪隻隻嘅表現都咁令人如意？查實當中亦不泛「藍燈籠」！
《香港討論區》網友日前選「藍色3大衰神」，結果，富貴於佢如浮雲嘅李嘉誠先生隻13號仔（和黃），同埋佢愛子李澤楷隻8號仔（電盈）脫穎而出，8搭13單Q勝出，而三重彩就係1串8再串13！
而網友最怨氣嘅，就係8搭13呢條單Q。100millionkid話：「PCCW已經係33隻成份股最細市值，今年係佢連續第7年下跌，再跌多幾年就破世界紀錄……即將會被踢出，百年基業沒落…市值318億嘅玖龍紙業都大過佢。」
西九龍重案組、caiyeulinh、nightfiber等人都認為，應該早啲踢8號仔出恒指成份股，唔好阻住地球轉！瀝古瀝古就更簡單：「私有化，無眼屎屎亁淨盲……」
好快俾中移動追過
咁13號呢？大家手已經唔係care佢嘅股價，反而係估緊大市火車頭中移動（941）股價幾時會過佢頭！歸納大部份網友意見，分別係ofcourse、遲早問題、指日可待、一點都不出奇同埋絕100%肯定會等！
而阿paulchen就話：「今個月應該過，大家都做電訊，李生，唉……」咁到底941過唔過到13呢？真係要拭目以待！