美國樂壇天后瑪麗嘉兒（MariahCarey）喺添馬艦個演唱會搞唔成，噚日就有班Band友喺嗰度大唱特唱。由12點唱到夜晚10點嘅「生力WildDayOutGrandShow2006」噚日喺添馬艦開騷，許懷欣、台灣樂隊旺福、謝安琪同DearJane等打頭陣已經吸引成3,000樂迷嚟欣賞，夜晚仲有關淑怡、陶喆同范曉萱等演出，可能會有更多觀眾。
許懷欣唱咗四首歌，其中唱到佢老竇許冠傑首《半斤八両》時，仲唱到鬼死咁rock，現場氣氛都好熱烈，佢個外籍老婆就一直喺台下打氣，許懷欣話：「我老婆鍾意企喺幕後睇，唔鍾意同我合唱。」問佢鍾意做紅館定bandshow，佢就話：「兩樣都好，呢度啲人好似開party咁，曬住太陽飲啤酒好relax。」