漢堡包！一向我都覺得係冇乜性格嘅食物，大大塊牛肉，掙飽人個肚就了事！走過出外國，捱過DoubleQuarterPounder（半磅牛肉漢堡），真係大件到可以當兩餐食！最近行經灣仔，開咗間Slim's美式酒吧加餐廳，佢好搞鬼整咗縮水版美式三「堡」，細到可以跳掌上舞！潮流興瘦身，連包也迎合潮流；喊減肥嘅女士們，見到都話卡娃兒呢！
記者：朱崇德
攝影：楊錦文
Slim'sChickenBurger$25（左）
比個網球剛好細了一圈！好味在芝麻包煎得香脆、雞胸以Cyjun香草醃製，帶有點點七味粉加椒鹽的惹味！
Slim'sBurger $25（中）
雖然話Slim，但係三個中最大一個！以FullSize免治牛扒，拍散再做成「厚」磅版，番茄、生菜極新鮮。
Slim'sHotDog$25（右）
睇唔出最惹味呢個，咪睇小條腸仔，原來係大蒜羊肉腸，入口鮮而搶！冇乜特別配料，就係為咗突出原汁風味。
Slim主題餐廳
叫Slim's其實是一種自嘲，主事人Rhys話：「酒吧餐廳長長窄窄，沿牆放一張高身枱加貼牆梳化，客人行過都摩肩接踵，叫Silm真係好合襯。」餐廳四周掛了琳琅滿目的明星、歌星海報，但如果你以為佢係食荷李活明星效應，你就大錯特錯，「細心留意每張海報，你都會發現有Slim一字！」苗條、纖細先至係餐廳嘅主題！為甚麼會有Slim'sBurger出現，大家或者已經意會了吧？
酒吧、輕食！本來就極合襯，「毗鄰係太古廣場3座，份量細唔Heavy，所以極符合OL上班族要求；而且量少有一個好處，就係可以叫多樣試試唔同口味，伴住嚟飲酒啱晒！」
朱古力啤酒未飲過
啤酒係呢度強項！不過喺度你唔會搵到土炮貨；42款來自比利時、英國及美國的特色啤酒，已經霸佔晒整個Menu，好似喺美國紐約最暢銷嘅BrooklynPilsnerLarger（$38），大家都可以喺呢度品嚐到；但講到特別又獨家嘅，就一定係來自比利時嘅LindemansKriek車厘子味啤酒，同FlorisChocolate朱古力味啤酒！「其實我哋係Elgrande旗下集團餐廳，由於自己有代理啤酒，所以先可以引進咁多不同口味。」不過講到記者最喜歡的，還是這裏可以任剝花生：「花生同啤酒本身就係一個絕配，邊剝、邊飲、邊傾偈，咁樣飲酒先過癮！」
Nacho's$75
粟米片配美式芝士最過癮係玩4層式威化，「每嚿都有兩層粟米片加兩層芝士！」配汁有墨西哥番茄、酸忌廉、牛油梨醬同墨西哥辣椒，食法多變。
ThaiBeefSalad$88
新鮮上等西冷切粗條，微微煎至3成熟，入口即化！仲可以食出泰式酸辣汁，配以沙律菜及青檸汁的確清新宜人，精神為之一振。
PhillyCheeseSteak$88
呢度一樣有賣大包之作！新鮮牛柳絲配青紅椒、香炒洋葱做包餡已極惹味；趁熱時再撒上軟芝士碎粒，純美式風味。
Pizza#2$108
餐廳熱賣Pizza！焗得脆如餅亁的包底，剛入口已經是一陣喝采；除大家一眼見到的黑水欖、番茄、冬菇外，最特別係加入了意大利肉腸、AndouilleSausage同ItalianPorkLink三種腸，集香、濃、辛辣口味於一身。
CrabCakes$75
呢個係最高成本之作，除大家見到面層的炸粉外，裏面完全係高級美國蟹肉，每件足有2安士，要自己喺外面買料，$75都買唔到咁多蟹肉啦，記者推介必食！
記者食後感
真係人不可以貌相！三個包未及巴掌大，估唔到食完竟然有8至9成飽！戰後檢討係不可眼闊肚窄，建議叫一個時食一個，花心一次叫晒嘅話，隨時食到卡路里超晒標！
搵食資料
Slim's（25281661）
地址：灣仔永豐街1號地下
座位：32個
交通：金鐘地鐵站F出口，沿金鐘道往銅鑼灣方向，轉入皇后大道東第一個街口。
人均消費：$120
最好賣：Slim'sBurger、Pizza#2
