近年發展商起樓都追趕環保潮流，市區重建局自從02年開始搵發展商合作搞市區重建項目以來，已經一直限定發展商要引入唔少環保建築概念。
市建局地區發展總監林偉能講，佢哋嘅項目招標前，已經首先參考香港環保建築協會製定嘅香港建築環境評估法（HK-BEAM），定立咗一啲起樓準則，並且將呢啲準則寫喺標書裏面先至招標。發展商攞到項目發展權後，就要開始同市建局及環保建築協會一齊去傾同落實以最環保方法起樓，且協會會一直監察同評分，至物業落成後畀一個總評。
由於與九龍建業（034）堅尼地城怡峯係最先起好嘅項目，所以個盤可以有個總評，而且仲係得到HK-BEAM裏面最高嘅評級白金級，整體評分有75分，其中室內環境質素更有86分咁高。
怡峯個盤就要使多600萬至700萬，但相信可以為業主帶來更舒適嘅居住環境。
市建局自從02年開始推出項目招標以來，已經有10個項目搵到發展商合作，另又有數個項目同房屋協會合作。